Mark 16:1-8 (Gothic version)

[marjaerwin]

Jah inwisandins sabbate dagis Marja so Magdalene jah Marja so Iakobis jah Salome usbauhtedun aromata, ei atgaggandeins gasalbodedeina ina. jah filu air þis dagis afarsabbate atiddjedun du þamma hlaiwa at urrinnandin sunnin. jah qeþun du sis misso: ƕas afwalwjai unsis þana stain af daurom þis hlaiwis? jah insaiƕandeins gaumidedun þammei afwalwiþs ist sa stains; was auk mikils abraba. jah atgaggandeins in þata hlaiw gaseƕun juggalauth sitandan in taihswai biwaibidana wastjai ƕeitai; jah usgeisnodedun. þaruh qaþ du im: ni faurhteiþ izwis, Iesu sokeiþ Nazoraiu þana ushramidan; nist her, urrais, sai þana staþ þarei galagidedun ina. akei gaggiþ qiþiduh du siponjam is jah du Paitrau þatei faurbigaggiþ izwis in Galeilaian; þaruh ina gasaiƕiþ, swaswe qaþ izwis. jah usgaggandeins af þamma hlaiwa gaþlauhun; dizuh~þan~sat ijos reiro jah usfilmei, jah ni qeþun mannhun waiht; ohtedun sis auk.